Hegglandsvegen 40, Tysnes

← Selg hos oss

Slik fungerer hylleleige

Frå du bestiller hylla til pengane står på konto.

Ei ledig hylleseksjon mellom fylte hyller i butikken
Slik ser hyllene ut hos oss. Den i midten er ledig. Merk at du kan flytte hylleplatene og velje kor dei skal sitje.

Prismodellar

Kor stor provisjonen er, kjem an på kor mykje du gjer sjølv.

20 %
når du leiger hylle og gjer arbeidet sjølv
25 %
når du hengjer opp utan å leige hylle – maks ti plagg, av omsyn til plassen
30 %
når du lagar ei oversikt over kva kvar vare skal koste, og vi registrerer og plasserer
35 %
når vi gjer alt: set pris, registrerer og plasserer varene

  1. Bestilling

    Du leiger ei hylle og legg tinga dine ut for sal i butikken. Hylleplass kan leigast frå éi til fem veker, og kan forlengast dersom det er ledige hyller. Vi tilrår at du bruker heile perioden, og gjerne forlengar etterpå. Vi er på Tysnes, og kundegrunnlaget er avgrensa – difor held vi hylleleiga låg. Har du berre nokre få plagg, kan du også henge opp klede og setje fram sko i butikken utan å leige hylle. Hugs at det du sel, må vere reint og luktfritt.

  2. Prismerking

    Når du leiger ein hylleplass, registrerer du alle varene dine i Din butikk. Alle varer må merkast med prismerke og strekkode, som du skriv ut i butikken ved starten av leigeperioden.

    Prislapp med hyllenummer, varenamn, pris og strekkode
    Prislappen du skriv ut i butikken. Du legg sjølv inn varenamn og pris når du registrerer varen. Hyllenummer, kundenummer, strekkode og varenummer lagar systemet.

  3. Fyll hylla (eller butikken)

    Fyll hylla med dei merkte varene. Korleis ho skal sjå ut, bestemmer du sjølv. Kleshengarar finn du i butikken, og vi tilrår å hengje opp mest mogleg: pent bretta plagg ligg sjeldan pent lenge. Passar noko betre andre stader i butikken, kan du setje det der – så lenge det er plass. Du kan til og med la varer stå att i butikken når hylleleiga går ut – ver då klar over at kommisjonen aukar noko.

  4. Følg salet ditt

    Sjekk salet fortløpande i Din butikk, og fyll på med fleire varer undervegs. Sjå gjerne innom hylla i butikken òg. Manglar det varer, har vi kameraopptak litt tilbake i tid. Bli med i Meirbruk – seljargruppa på Facebook, der vi legg ut plagg vi finn utan prislapp, og varer som har blitt hengande.

  5. Utbetaling

    To gonger i månaden overfører vi pengane for det som er selt til kontoen din, med provisjonen vår trekt frå. Du får også ein e-post med oversikt over salet og bilag du kan bruke i rekneskapen. Elles finn du oversikt over sal og utbetalingar på kontoen din i Din butikk.

Tips til deg som skal selje

Reint og heilt

Klede og gjenstandar du skal selje, må vere reine, heile og utan lukt.

Prising

Ta på deg brillene til kjøparen når du set prisen. God kvalitet til låg pris sel best.

Ikkje overfyll hylla

For mykje på hylla gjer det vanskeleg å sjå skattane. Fyll heller på etter kvart som du sel.

Vis fram varene dine

Hylla di er butikken din. Del det du sel i sosiale medium, så aukar sjansen for sal.

Tenk sesong

Det er freistande å rydde ut etter ein sesong, men erfaringa vår er at sesongvarer sel best når sesongen startar, ikkje når han er over. Men du bestemmer sjølv.

Hugs kven som bestemmer

Du bestemmer over hylla du leiger, og vi bestemmer over resten av butikken. Heng du varer der vi meiner dei ikkje passar inn, kan det hende vi ryddar dei tilbake til hylla di.

Klar til å prøve?

Hylla bestiller du direkte på nett. Har du spørsmål før du bestemmer deg, er det berre å ta kontakt.

Bestill hylle Spør oss først